დღეს სარფში ქართველი მძღოლების ერთმა ნაწილმა, რომლებსაც თურქეთის ტერიტორიაზე მგზავრები გადაჰყავთ, გზა გადაკეტეს. აქციის მონაწილეების მიერ ავტომაგისტრალი ამ დროისთვის [12:00 სთ] გადაკეტილია. ინფორმაციას “ბათუმელები” ავრცელებს.
მძღოლებმა, რომლებიც თავს დაზარალებულად მიიჩნევენ, ათი დღის წინ ბათუმში თურქეთის საკონსულოსთან აქცია გამართეს. მათი თქმით, თურქეთში პოლიციამ ისინი უსამართლოდ დააჯარიმა და ავტომანქანები ჩამოართვა. ამასთან, ქართველ მძღოლებს თურქეთში არასათანადოდ ეპყრობიან, ტრაპიზონში საქართველოს საკონსულოში კი მათ ყურადღებას არ აქცევენ. მძღოლების მოთხოვნა იყო და არის, რომ ქართველ მძღოლებს, რომელთაც საქართველოდან თურქეთში ტურისტები გადაჰყავთ, მუშაობის საშუალება მისცენ.
„მთავარი მოთხოვნაა ჩვენს მძღოლებს ნუ ავიწროებენ თურქეთში და გვქონდეს თავისუფალი გადაადგილების უფლება მგზავრებთან ერთად. ჩვენი საკონსულო ტრაპიზონში ვერ მუშაობს სათანადოდ. თურქეთის საკონსულო თავის ხალხს პატივს სცემს, მხარში უდგანან ყველანაირად. ჩვენმა საკონსულომ კი რა გააკეთა? – დაპირებები მარტო. ვერ გვპატრონობენ იქ – მანქანებს ართმევენ, ცემენ, საბუთებს უხევენ. კანონია ასეთიო. როგორ, თურქეთს აქვს კანონი და ჩვენ არა? ხომ შეიძლება მოლაპარაკება იქაურ გუბერნატორთან, რომ 2-3 დღით გადავიყვანო პატარა მანქანით მგზავრები და დავათვალიერებინო ტრაპიზონი? 350 ლირას რაში ვიხდი – თვეში 4-ჯერ მაქვს გადასვლის უფლება, მეტჯერ არა. ცარიელი რად მინდა რომ გადავიდე? ამხელა ფულს რაში ვიხდი? მარტო გადავისეირნო-გადმოვისეირნო?“ – ამბობს მერაბ შარაშიძე, აქციის ერთ-ერთი მონაწილე.
მისივე თქმით, მას დოკუმენტში 350 ლირა გადაახდევინეს, „ნაცნობმა მძღოლმა მითხრა მე 250 ლირა გადამახდევინესო. ანუ მათაც არ იციან რამდენი უნდა გადაგვახდევინონ. ეს ხალხი ჩვენ რომ გადაგვყავს, იქ ფულს ხარჯავენ, ესეც ხომ მათთვის სარგებელია. მე ავტომანქანა ჩამომართვეს, იქ საჯარიმოზეა, ხვალ გაუდის 15-დღიანი ვადა. 1007 ლირით დამაჯარიმეს. დამატებით 800 ლირამდე კიდევ მექნება გადასახდელი იმისთვის, რომ მანქანა საჯარიმოზე დგას“.
ბათუმში თურქეთის საკონსულოს განცხადებით, მძღოლებმა, რომელთაც თურქეთის ტერიტორიაზე მგზავრები გადაჰყავთ, სპეციალური ნებართვა თურქეთის ტრანსპორტისა და ინფრასტრუქტურის სამინისტროში უნდა მიიღონ.
თურქეთსა და საქართველოს შორის გაფორმებულ ხელშეკრულებაში, რომელიც 1995 წლის ივნისიდანაა ძალაში, ტერმინების განმარტებაში აღნიშნულია, რომ ტერმინი – „სატრანსპორტო საშუალება“ მგზავრთა გადაყვანის დროს ნიშნავს ავტობუსს ან ნებისმიერ ავტოსატრანსპორტო საშუალებას, რომელსაც გააჩნია არა უმცირეს 8 დასაჯდომი ადგილი მძღოლის ადგილის ჩაუთვლელად. ქართველი მძღოლების ნაწილი, რომელთაც ტურისტები გადაჰყავთ თურქეთში, ამბობენ, რომ მათ ექვსადგილიანი მინივენები ჰყავთ.