მოწეული აქვს თუ არა მარიხუანა, ვინ არის მისთვის ყველაზე ლამაზი ქალი პოლიტიკოსი, ვის ისურვებდა პრეზიდენტად, – “მეტრონომმა” საპარლამენტო უმრავლესობის წევრ ზაქარია ქუცნაშვილთან ბლიც-ინტერვიუ ჩაწერა.
მეტრონომი: რას აკრძალავდით ქვეყანაში?
ზაქარია ქუცნაშვილი: ადამიანის პატივისა და ღირსების შელახვას.
მეტრონომი: ვინ არის ყველაზე ლამაზი ქართველი ქალი პოლიტიკოსი?
ქუცნაშვილი: ყველა ქალი სიმპათიურია.
მეტრონომი: მარიხუანა თუ გაქვთ მოწეული?
ქუცნაშვილი: მგონი, სტუდენტობისას გასინჯული უნდა მქონდეს. მოწეული კი არა, გასინჯული.
მეტრონომი: “ბასიანზე” ან სხვა ღამის კლუბში თუ ყოფილხართ?
ქუცნაშვილი: ღამის კლუბებში როგორ არ ვყოფილვარ. “ბასიანზე” არა, საპატრიარქოს გვერდით იყო “NIGHT OFFICE” და იქ დავდიოდი.
მეტრონომი: 17 მაისი ოჯახის სიწმინდის დღეა თუ ჰომოფობიასთან ბრძოლის დღე?
ქუცნაშვილი: ყოველდღე ოჯახის სიწმინდის დღეა და ყოველდღე ჰომოფობიასთან ბრძოლის დღეა. არც ერთს არ გამოვყოფდი.
მეტრონომი: საზოგადოებრივი მაუწყებელი თუ გვჭირდება?
ქუცნაშვილი: კი, გვჭირდება.
მეტრონომი: ყველაზე მეტად ვინ აკლია დღეს აქტიურ პოლიტიკას?
ქუცნაშვილი: თქვენ წარმოიდგინეთ, ბიძინა ივანიშვილი.
მეტრონომი: უნდა აღინიშნებოდეს თუ არა 9 მაისი.
ქუცნაშვილი: რა თქმა უნდა, უნდა აღინიშნებოდეს. ეს არის ფაშიზმზე გამარჯვების დღე და მაშინ ცივილიზებული სამყარო მთავარი ბოროტების წინააღმდეგ დაირაზმა.
მეტრონომი: რა ასოციაციას იწვევს თქვენში გიორგი მარგველაშვილი?
ქუცნაშვილი: ფილოსოფოსის.
მეტრონომი: მომძლავრებულია თუ არა დღეს რუსული გავლენები?
ქუცნაშვილი: მთელ პოსტსაბჭოთა სივრცეშია მომძლავრებული. რუსეთმა პოსტაბჭოთა სივრცეში გავლენის აღდგენა დაისახა მიზნად.
მეტრონომი: საქართველოს გარდა, სხვაგან სად იცხოვრებდით?
ქუცნაშვილი: საქართველოს გარდა, სხვაგან ცხოვრებას არ ვაპირებ. თუმცა, ბევრი ქვეყანა მომწონს. მაგალითად, ავსტრია, ვენა საოცარი ქალაქია.
მეტრონომი: ივანიშვილის გარდა, ვის ისურვებდით პრეზიდენტად?
ქუცნაშვილი: მაგას ცოტა მოგვიანებით გეტყვით.
მეტრონომი: რას შეცვლიდით ქვეყანაში?
ქუცნაშვილი: საკადრო პოლიტიკას.
მეტრონომი: რომელი პოლიტიკოსი მოგწონთ ოპოზიციიდან?
ქუცნაშვილი: ოპოზიციიდან გაწონასწორებული პიროვნებაა გიგი წერეთელი. ასევე გაწონასწორებული კაცია დავით ბაქრაძე.
ავტორი: ბესო კუნელაური