ბარნოვის ქუჩაზე მოკლული 25 წლის თამარ გამრეკელაშვილი თელავის მუნციპალიტეტის სოფელ სანიორეში დაკრძალეს. მის დაკრძალვაზე მივიდნენ ოპოზიციური პარტიების და არასამთავრობო ორგანიზაციების წარმომადგენლებიც.
პროკურატურის ინფორმაციით, 25 წლის ქალი 13 აპრილს, თბილისში, ბარნოვის ქუჩაზე ორი მცირეწლოვანი შვილის თვალწინ მოკლეს. მისი მკვლელობის ბრალდებით დაკავებულია მამინაცვალი, ვეფხია ბაქრაძე, რომელსაც სასამართლომ წინასწარი პატიმრობა შეუფარდა.
გამოძიება 11 პრიმა 109–ე მუხლით მიმდინარეობს, რაც ოჯახში ძალადობის ნიადაგზე ჩადენილ განზრახ მკვლელობას დამამძიმებელ გარემოებაში გულისხმობს. აღნიშნული მუხლი 16–დან 20 წლამდე ან უვადო პატიმრობას ითვალისწინებს.
მომხდარი მკვლელობის საქმეზე კიდევ ერთი პირი, თემურ ბაქრაძე, ვეფხია ბაქრაძის ახლო ნათესავი, დანაშაულის შეუტყობინებლობის ბრალდებით დააკავეს. ჩადენილი დანაშაული 2-დან 4 წლამდე ვადით თავისუფლების აღკვეთას ითვალისწინებს. მასაც სასამართლომ წინასწარი პატიმრობა შეუფარდა.