ცნობილი ქართველი მსახიობი ლეილა აბაშიძე 88 წლის ასაკში გარდაიცვალა. ამის შესახებ ინფორმაციას პირველი არხი ავრცელებს. ინფორმაცია პირველ არხს მსახიობის ოჯახის წევრებმა დაუდასტურეს.
მსახიობი ბოლო რამდენიმე კვირის განმავლობაში საავადმყოფოში იმყოფებოდა.
ქართველი მსახიობი, ლეილა აბაშიძე 1929 წლის 1-ელ აგვისტოს თბილისში დაიბადა.
1951 წელს დაამთავრა თბილისის რუსთაველის სახელობის თეატრალური ინსტიტუტის სამსახიობო ფაკულტეტი.
1940 წლიდან მუშაობდა კინოსტუდია „ქართულ ფილმში“. 1941 წელს ითამაშა კატოს როლი კონსტანტინე პიპინაშვილის ფილმში „ქაჯანა“.
განსაკუთრებული პოპულარობა მან მოიპოვა ფილმებში „ისინი ჩამოვიდნენ მთიდან“, „ჭრიჭინა“, „აბეზარა“, „მაია წყნეთელი“, „შეხვედრა მთაში“ შესრულებული როლებისთვის.
1966 წელს სიკო დოლიძის ფილმში „შეხვედრა წარსულთან“ ქალის როლის საუკეთესო შესრულებისათვის ლენინგრადის საკავშირო კინოფესტივალის პირველი პრემია მიიღო.
კონსტანტინე პიპინაშვილთან ერთად, დაწერა სცენარი „მოლოდინი“, რომელიც შოთა და ნოდარ მანაგაძეებთან ერთად გადაიღო.
იყო მხატვრული ფილმების „მოლოდინი“ (1970), „კოშკები სდუმან“ (1978) სცენარის ავტორი, მხატვრული ფილმის „თბილისი, პარიზი, თბილისი“ სცენარის ავტორი და რეჟისორი.
წყარო: 1tv