ხორავას ქუჩაზე მომხდარი მკვლელობის საქმეზე დახურულ პროცესებს მონიტორინგს სახალხო დამცველის აპარატი გაუწევს. მოსამართლემ მიიღო გადაწყვეტილება და სხდომაზე დაუშვა სახალხო დამცველის წარმომადგენელი.
არასრულწლოვანთა მართლმსაჯულების კოდექსის მიხედვით, არასრულწლოვნების პროცესი დახურულია და სხდომაზე დასწრების უფლება მხოლოდ მხარეებსა და ბრალდებულის კანონიერ წარმომადგენელს აქვს.
წინა სხდომაზე დასწრების უფლება მოსამართლემ დაზარალებულებს, გარდაცვლილი არასრულწლოვნების მშობლებს მისცა. დღეს კი ასეთივე მოთხოვნა სახალხო დამცველის აპარატსაც ჰქონდა, რასაც ომბუდსმენის შესახებ საქართველოს კანონი არეგულირებს.
დღევანდელ სხდომაზე არასრულწლოვნების მკვლელობის საქმეზე დაცვის მხარე ალტერნატიული ექსპერტიზის დასკვნას წარადგენს. პროცესზე ბრალდების ორი მოწმე დაიკითხება.
შეგახსენებთ, რომ ხორავას ქუჩაზე 1-ელ დეკემბერს ორი მოზარდი დაჭრეს. მათგან ერთი იმავე დღეს საავადმყოფოში მიყვანამდე გარდაიცვალა, ხოლო მეორე რესპუბლიკურ საავადმყოფოში დაიღუპა.
მომხდართან დაკავშირებით, შინაგან საქმეთა სამინისტრომ ორი არასრულწლოვანი დააკავა, რომელთაც დამამძიმებელ გარემოებებში ჩადენილი განზრახ მკვლელობა ედება ბრალად. დანაშაულის შეუტყობინებლობის ბრალდებით პროკურატურამ პასუხისგებაში 5 პირი მისცა, საიდანაც სამართალდამცველებმა მხოლოდ სამი დააკავეს, ვინაიდან 5 პირიდან ორზე არასრულწლოვანთა მართლმსაჯულების კოდექსი ვრცელდება.