საქართველოს ადვოკატთა ასოციაციის თავმჯდომარის არჩევნების მეორე ტური იწყება. ამ წუთებში თბილისის სპორტის სასახლეში დელეგატების რეგისტრაციის პროცესი მიმდინარეობს, უშუალოდ ხმის მიცემის პროცესი კი 15:00 საათიდან დაიწყება.
ადვოკატთა ასოციაციის ახალი თავმჯდომარე 4 წლით უნდა აირჩიონ. არჩევნებზე სულ რეგისტრირებულია 4568 დელეგატი. იმის გამო, რომ პირველ ტურში ვერც ერთმა კანდიდატმა არჩევნებში მონაწილე დელეგატთა ხმების 50%-ზე მეტი ვერ დააგროვა, კენჭისყრის მეორე ტური დაინიშნა. მეორე ტურში საუკეთესო შედეგების მქონე 2 კანდიდატი – ლევან ჯანაშია და დავით ასათიანი მონაწილეობენ.
ადვოკატთა ასოციაციის თავმჯდომარეობის კანდიდატის, ლევან ჯანაშიასა და მისი 8-კაციანი ჯგუფის მოთხოვნა, თავმჯდომარის არჩევნების მეორე ტურის ჩატარების აკრძალვისა და არჩევნების კენჭისყრის შედეგების შემაჯამებელი ოქმის მოქმედების შეჩერების თაობაზე, თბილისის საქალაქო სასამართლომ არ დააკმაყოფილა.
ადვოკატთა ასოციაციის თავმჯდომარის არჩევნების პირველი ტური 9 დეკემბერს ჩატარდა.