თბილისში, ხორავას ქუჩაზე მომხდარი მკვლელობის საქმეზე დანაშაულის დაფარვაში ბრალდებული თენგიზ კალანდია დანაშაულს აღიარებს. ამის შესახებ სასამართლო სხდომის დაწყებამდე მისმა ადვოკატმა განაცხადა.
დარეჯან ბუცხრიკიძის თქმით, ინფორმაცია იმის შესახებ, თითქოს ის ბრალდებულს მიმალვაში მიეხმარა, სიცრუეა.
“თენგიზ კალანდია აღიარებს დანაშაულს. მას ბრალად სისხლის სამართლის 375-ე მუხლი აქვს წაყენებული, რაც დანაშაულის დაფარვას გულისხმობს და სასჯელად 1-დან 3 წლამდე პატიმრობას ითვალისწინებს. მას მტკიცებულების განადგურებაზე ბრალი არ აქვს წაყენებული. თუ ვინმეს გონია, რომ კალანდიამ ხელი შეუშალა გამოძიებას, პირიქით, ყველამ იცოდეს, რომ მან ხელი შეუწყო გამოძიებას. რაც შეეხება ინფორმაციას, თითქოს ის ბრალდებულს მიეხმარა მიმალვაში, სიცრუეა. დახმარება არ ნიშნავს, რომ შვილი სახლში მიიყვანო და მას მეგობარი ახლდეს”,- განაცხადა ადვოკატმა.
შეგახსენებთ, რომ საქალაქო სასამართლოში ხორავას ქუჩაზე მომხდარი მკვლელობის საქმეზე დანაშაულის დაფარვაში ხუთი ბრალდებულის პროცესი ამ წუთებში მიმდინარეობს. სხდომაზე ბრალდებულთა მიმართ აღკვეთის ღონისძიებაზე მსჯელობენ.