საქართველოს ყოფილი თავდაცვის მინისტრი თინა ხიდაშელი შეერთებული შტატების მიერ საქართველოსთვის “ჯაველინის” ტიპის სარაკეტო სისტემებისა და დანადგარების მიყიდვის გადაწყვეტილებას ეხმაურება. მისი თქმით, ეს გადაწყვეტილება ბევრი ადამიანის დიდი შრომის შედეგია. ხიდაშელის განცხადებით, 2008 წლის ომის შემდეგ ქვეყნის შიგნით და გარეთ უზარმაზარი ძალისხმევა იყო მიმართული ქართული ჯარის და ქვეყნის თავდასცვისუნარიანობის გასაძლიერებლად.
“ბევრი დიდი და პატარა ნაბიჯი გადაიდგა და დიდი და პატარა შეთანხმება შედგა. ამავდროულად, ჩვენი მეგობრების და პარტნიორების დაუღალავი მხარდაჭერის შედეგი მივიღეთ დღეს. ყველა ის განცხადება რომელიც სენატიდან და წარმოამდგენელთა პალატიდან მოგვისმენია, და რომელზეც რუსული და მას აყოლილი ქართული პროპაგანდის მანქანა ქირქილებდა, სწორედ ამ გადაწყვეტილებაში აისახება.
2016 ივლისში როდესაც განვაცხადეთ რომ სრულიად ახალი ეტაპი იწყებოდა და ისტორიულ ხელშეკრულებას მოვაწერეთ ხელი ჩვენს სტრატეგიულ პარტნიორთან ძალიან სკეპტიკურად გვიყურებდნენ. არადა, პირველად მოხდა რომ ხელშეკრულებაში ნაცვლად საერთაშორისო ტერორიზმის წინააღმდეგ ბრძოლის, სამშვიდობო ოპერაციებში მონაწილეობისა და სხვა გარე მისიების კვალდაკვალ პირველად ჩაიწერა: საქართველოს ტერიტორიული თავდაცვისთვის მხარდაჭერა. 2016 წლის შეთანხებით წინ კიდევ ბევრი მნიშვნელოვანი სიახლე იქნება.
ეს მხოლოდ პირველი ნაბიჯია. ყველას გილოცავთ, ვისაც უფრო ძლიერი საქართველო გინდათ იხილოთ ხვალ. განსაკურებით კი იმ ადამიანებს ვინც ბოლო 8 წლის მანძილზე თავდაუზოგავად იშრომა შედეგისთვის. მეამაყება, რომ 2016 წელს, თავდაცვის ძალიან მაგარ გუნდთან ერთად, შევძელით ხელშეკრულების ბოლომდე მიყვანა და რეალობად ქცევა”,-წერს ხიდაშელი “ფეისბუქის” საკუთარ გვერდზე.
შეგახსენებთ, რომ შეერთებულმა შტატებმა საქართველოსთვის “ჯაველინის” ტიპის სარაკეტო სისტემის და დანადგარების მიყიდვის გადაწყვეტილება მიიღო. შესაბამისი მოთხოვნით ვაშინგტონს ქართულმა მხარემ მიმართა. სახელმწიფო დეპარტამენტმა ამ მოთხოვნას მხარი დაუჭირა, თავდაცვის უსაფრთხოების თანამშრომლობის სააგენტომ კი, იარაღის სავარაუდო მიყიდვის შესახებ კონგრესს აცნობა.
უწყების ოფიციალურ განცხადებაში ნათქვამია, რომ ეს გარიგება ხელს შეუწყობს საქართველოს უსაფრთხოების გაუმჯობესებას, ჯაველინის სისტემები კი, ქვეყნის თავდაცვის შესაძლებლობების მოთხოვნებს დააკმაყოფილებს.