206-ე ბაღის მეორე სართულიდან გადმოვარდნილი ბავშვის დეიდა ირმა გ. ფეისბუქის პირად გვერდზე ბაღის დირექტორს გულგრილობაში ადანაშაულებს:
“არავის განკითხვას არ ვაპირებდი, მაგრამ სწორედ განუკითხაობა გვკლავს! 3 წლის ბავშვი, სრულიად ჯანმრთელი, მშვიდი, აზრიანი, საბავშვო ბაღში მეხუთე დღეს მიყვანილი, დილის 10 საათზე გადის საძინებელში, ფანჯარასთან მიდგმულ საწოლზე ძვრება, ადის საწოლის თავზე და იქიდან ბობღდება რაფაზე, ვარდება მეორე სართულიდან (უგისოსო) ბეტონზე და უტყდება თავის ქალა! და არც არავინაა მომკითხავი!
მოპირდაპირე კორპუსიდან ხედავს ახალგაზრდა, მირბის ბაღში, ეჯაჯგურება ჭიშკარს (ზარი რა გახდა ხალხო!), ყვირის ბავშვი, ბავშვიო!!! ძვრება ბადეზე, ხტება და მოჰყავს გონზე ისე, რომ ბაღის ხალხი გონზე არ არის და მერე გამოდის ეს ნაძირალა ბაღის დირექტორი მ ა რ ი ნ ა გ ო გ ო ლ ა ძ ე და აცხადებს: ბავშვს სამჯერ ჰქონდა მცდელობა და დააგვირგვინაო!!! ყველა მის მიერ თქმული სიტყვა არის ტყუილი! თვალით არ უნახავს ბავშვი! სულ ოთხჯერ გვყავდა და შუადღისას ძიძას მიჰყავდა!
ინკლუზიური გონების არაქალს, როგორ უშვებენ განათლების სფეროში?
ხალხო, როგორ მიდიან ასეთები თანამდებობებზე?
ჩვენი ბრალია!!!
ჩვენი უუნარობის!!!
ჩვენი უსუსურობის!!!
მხოლოდ ჯვრის თაყვანისცემა ვერ გვიშველის!
ყველამ უნდა ვზიდოთ ჩვენი ჯვარი!!!
ჩვენი ჯვარი კი ისიცაა, რომ არ მივუშვათ არადამიანები თანამდებობებზე, რადგან დღეს ჩემი, ხვალ სხვისი შვილი მოხვდება არაკაცების ხელში!!!
ხედავ, ბაღში დირექტორი არის ფსიქოპატი?! გამოიყვანე ბავშვი, კი ბატონო, მაგრამ ბოლომდე მიჰყევი, არ დატოვო “ის” ბავშვებთან!
ხედავ, სკოლაში დირექტორია უზნეო, გამოიყვანე შვილი, მაგრამ ეს ფაქტი აღნიშნე!
მე ავიტან ცუდ გამყიდველს, რომ მიღრენს, ცუდ მეეზოვეს, ნახევრად მოუგველს რომ ტოვებს, ცუდ მეზობელს, ძაღლის ხმა რომ აღიზიანებს, მაგრამ ბავშვებს, ანგელოზებს არ უნდა გავაკაროთ ეს.. ეს… არ ვიცი, რა ვუწოდო ამ ნაძირლებს!” – წერს მცირეწლოვანის დეიდა.
შეგახსენებთ, ზემო ფონიჭალაში 206-ე ბაგა-ბაღის მეორე სართულიდან ბავშვი გადმოვარდა. ბავშვი ინგოროყვას კლინიკაში იქნა გადაყვანილი. მისი მდგომარეობა ამ ეტაპზე სტაბილურად მძიმეა. მას ფილტვის დაზიანება და მოტეხილობები აღენიშნება. ექიმის თქმით, გოგონას სიცოცხლეს საფრთხე არ ემუქრება.
საქმეზე გამოძიება შსს-მ 124-ე მუხლით დაიწყო, რაც გაუფრთხილებლობით ჯანმრთელობის ნაკლებად მძიმე დაზიანებას გულისხმობს. ეს დანაშაული ისჯება ჯარიმით ან გამასწორებელი სამუშაოთი ორ წლამდე ვადით ანდა ორ თვემდე პატიმრობით. 206-ე ბაგა-ბაღის დირექტორის მარინა გოგოლაძის განცხადებით, ბავშვი, რომელიც მეორე სართულიდან გადმოვარდა, სპეციალური საჭიროების მქონეა. დირექტორი უარყოფს ინფორმაციას, თითქოს გოგონა უყურადღებოდ იყო მიტოვებული.