ლონდონის პოლიციამ ტერაქტის თანამონაწილეობაში ეჭვმიტანილი 12 ადამიანი დააკავა. უწყების განცხადებით, ისინი ლონდონის აღმოსავლეთ რეგიონში ჩატარებული სპეცოპერაციების დროს დააკავეს.
სამართალდამცავები გამოძიების ინტერესებიდან გამომდინარე დაკავებულთა ვინაობას არ ასახელებენ. ინფორმაციას “როიტერსი” ავრცელებს.
ლონდონის ხიდზე თეთრი ფერის მიკროავტობუსი გუშინ საღამოს ფეხითმოსიარულეებს დაეჯახა. მიკროავტობუსის საჭესთან იჯდა კაცი, რომელიც საათში დაახლოებით 80 კილომეტრის სიჩქარით მოძრაობდა. დაშავდა 48 ადამიანი. თვითმხილველების თქმით, ამის შემდეგ, ავტომობილიდან სამი “სამხრეთული” გარეგნობის ადამიანი გადმოხტა დაახლოებით 30 სანტიმეტრიანი დანებით ხელში და თავს დაესხნენ გამვლელებს. მიკროავტობუსი დაიძრა და სწრაფად მიიმალა ადგილიდან.
The Sun-ის ცნობით, ლონდონის ხიდთან ახლოს Boro Market-ზე, უცნობი, დანით შეიარაღებული კაცი თავს დაესხა რესტორანს, საიდანაც დაშავებულები გამოჰყავდათ. მესამე ინციდენტი მოხდა ვოქსჰოლის რაიონში.
ლონდონის პოლიციის ცნობით, ტერაქტის შედეგად 6 ადამიანი დაიღუპა. ამის შესახებ სკოტლენდ-იარდის წარმომადგენელმა მარკ როულიმ განაცხადა.
ბრიტანეთის პრემიერმინისტრმა ტერეზა მეიმ განაცხადა, რომ ლონდონის ცენტრში თავდასხმების სერია განიხილება, როგორც “ტერორიზმის პოტენციური აქტი”.
როგორც ლონდონის პოლიციაში აცხადებენ, პოლიციამ სამივე ეჭვმიტანილის ლიკვიდიცია მოახერხა.
მათივე ინფორმაციით, სამივე თავდამსხმელს ტანზე შაჰიდის ქამრის მსგავსი ჰქონდათ, თუმცა იქ არ იყო ასაფეთქებელი მოწყობილობა და რეალური საფრთხის შემცველი არ იყო.