საქართველოს საპატრიარქო განცხადებას ავრცელებს, რომელშიც ღიად ემიჯნება მისი იურისტის, ედიშერ ქარჩავს მიერ გაკეთებულ განცხადებებს ჭყონდიდის მიტროპოლიტის, პეტრე ცაავას შესახებ.
განცხადება საპატრიარქოს ოფიციალურ ვებგვერზეა გამოქვეყნებული:
“ბატონ ედიშერ ქარჩავას ბოლოდროინდელი განცხადებები საქართველოს საპატრიარქოსთან არ იყო შეთანხმებული.
მის მიერ განმარტებული მიზეზი ასეთი ქმედებისა არის სერიოზული, მაგრამ გადაწყვეტილების დამოუკიდებლად მიღება და საჯარო სივრცეში პირადი ინიციატივით წარმოჩენა არასწორია.
ის ფაქტი, რომ ზოგიერთი სასულიერო პირი კათოლიკოს-პატრიარქის ლოცვა-კურთხევასა და წმინდა სინოდის მოწოდებებს არღვევს და ნებართვის გარეშე სატელევიზიო გამოსვლებს არ ერიდება, ცალკე განსჯის საგანია, მაგრამ ასეთი ქცევა გამამართლებელი არ არის არავისთვის, მათ შორის, არც ბატონი ედიშერისთვის, რის გამოც იგი იქნა გაფრთხილებული.
მოვუწოდებთ ყველას, პირადი ინიციატივებისაგან შეიკავონ თავი”- ნათქვამია განცხადებაში.
შეგახსენებთ, ედიშერ ქარჩავამ ჭყონდიდელი მიტროპოლიტი პეტრე ცაავა პატრიარქის მოკვდინების მცდელობაში დაადანაშაულა და განაცხადა, რომ მისი თანამზრახველი დეკანოზი გიორგი მამალაძე ციხეში ზის.