თბილისის მერიასთან აუტიზმის სპექტრის დარღვევების მქონე ბავშვების მშობლები აქციას მართავენ. აქციის მონაწილეები თბილისის მერიის იმ გადაწყვეტილებას აპროტესტებენ, რომლის მიხედვითაც, მათ შვილებს თერაპიისთვის განკუთვნილი დაფინანსება შეუმცირდებათ. ისინი მთავრობის წარმომადგენლებთან შეხვედრას ითხოვენ.
მშობლების თქმით, იმის შესახებ, რო მათ შვილებს თერაპიისთვის განკუთვნილი დაფინანსება შეუმცირდებათ, ინფორმირებულები არ ყოფილან. მერიის გადაწყვეტილება კი მათი შვილების მდგომარეობას გაართულებს.
თბილისის მერიამ „აუტიზმის სპექტრის დარღვევის მქონე ბავშვთა რეაბილიტაციის“ ქვეპროგრამის განხორციელების წესში ცვლილებები შეიტანა. მერიაში აცხადებენ, რომ ცვლილებების პროექტი უახლოეს დღეებში დედაქალაქის საკრებულოს გადაეგზავნება განსახილველად.
„ჯანდაცვისა და სოციალური მომსახურების საქალაქო სამსახურის მიერ წარდგენილი ცვლილებების შესაბამისად, ქვეპროგრამით სარგებლობის უფლება ექნებათ დაავადებათა საერთაშორისო კლასიფიკატორის (ICD-10) განვითარების ზოგადი აშლილობების (F84.0; F84.9) ჯგუფის დიაგნოზის მქონე 2-დან 15 წლის ასაკის ჩათვლით საქართველოს მოქალაქეებს. ქვეპროგრამაში ჩართვის მსურველები, თბილისის მერიისთვის განცხადებით მიმართვამდე, ბოლო 1 წლის განმავლობაში და ამავდროულად, ქვეპროგრამაში ჩართვის დროისთვის თბილისის მუნიციპალიტეტში უნდა იყვნენ რეგისტრირებულნი, მათ შორის არიან ის პირები, რომლებსაც თბილისში 1 წლიან რეგისტრაციაში მისამართის შეცვლის გამო უფიქსირდებათ წყვეტა; პირები, რომლებიც 2015 წლის 1 ივლისის შემდეგ დაიბადნენ და რომლებსაც ქვეპროგრამაში ჩართვის დროისთვის 2 წელი შეუსრულდათ; იძულებით გადაადგილებული პირის სტატუსის მქონე პირები, რომლებიც დევნილის სტატუსის დამადასტურებელი დოკუმენტის მიხედვით თბილისის მუნიციპალიტეტში არიან რეგისტრირებულნი.რაც შეეხება ქვეპროგრამის ფარგლებში დაფინანსების წესს, ქვეპროგრამის ფარგლებში 7 წლამდე ასაკის მოსარგებლისთვის დაფინანსდება კომპლექსური თერაპიის 20 (მინიმუმ ერთსაათიანი) სეანსი, ხოლო 7 წლის და ზემოთ ასაკის მოსარგებლისთვის – 15 სეანსი. 7 წლამდე ასაკის მოსარგებლისათვის ვაუჩერის ღირებულება შეადგენს 420 ლარს, ხოლო 7 წლის და ზემოთ ასაკის მოსარგებლისათვის – 315 ლარს“,- ნათქვამია მერიის განცხადებაში.
ცვლილებას აპროტესტებენ აუტიზმის სპექტრის მქონე ბავშვების მშობლები. მათი თქმით, ცვლილების მიხედვით, შვიდ წლამდე ბავშვებს რეაბილიტაციისთვის გამოყოფილი საათები უმცირდებათ.
შეგახსენებთ, რომ ამჟამინდელი დოკუმეტის მიხედვით, აუტიზმის სპექტრის მქონე ბავშვებისთვის სარეაბილიტაციო კურსში ჩასართავად დარეგისტრირების ვადად განსაზღვრული იყო 2015 წლის პირველი ივლისი, რამაც გაუგებრობა გამოიწვია და მოჰყვა პროტესტი მშობლების მხრიდან.