პარტია კანონი და სამართლის ლიდერი თაკო ჩარკვიანი დიპლომატიურ კორპუსს საქართველოს მესამე პრეზიდენტის, მიხეილ სააკაშვილის დახმარების თხოვნით მიმართავს.
როგორც ჩარკვიანი სოციალურ ქსელში წერს, სააკაშვილს სამართლიანი მართლმსაჯულების გამოყენების უფლება უნდა მიეცეს.
“დიდი პატივისცემით მივმართავ (როგორც დეპუტატი), ჩვენს მეგობარ ელჩებს აკრედიტირებულ დიპ.კორპუსს, რომლებთანაც, არაერთი შეხვედრა მქონდა, ოფიციალური წერილიც გადავეცი და დავუგზავნეთ, სადაც ევროპული კონვენციის მე-6-ე მუხლის (თანახმად) ამუშავებას ვითხოვთ, რომ ” მიეცეს პრეზიდენტ სააკაშვილს სამართლიანი მართლმსაჯულების გამოყენების უფლება”. დიდი მადლობა მინდა გადავუხადო ყველა დასავლელ მეგობარს გულისხმიერი გამოხმაურებისთვის.
ახლა, ასეთი ვითარებაა ძვირფასო მეგობრებო და ჩვენი ქვეყნის გულშემატკივრებო! წამზომი ჩართულია, ყოფილი პრეზიდენტის სიცოცხლე საფრთხეშია, მისი განადგურება დიდი სირცხვილი, სამომავლოდ დიდი ტვირთი და გამოუსწორებელი შეცდომა იქნება ჩვენი ქვეყნისთვის, ის რუსეთის მიერ დევნილი პრეზიდენტია და დღეს ის რუსეთზე მომუშავე, რუსეთის “მოსამსახურე” ხელისუფლების ციხეშია, ეს მოსალოდნელ უბედურებას ნიშნავს.
ვითვალისწინებ ეტიკეტს და ეთიკურ ნორმებს და ვიცი რა რთულია ამ ვითარებაში მოქმედება , მითუმეტეს როცა ყველამ ვიცით, რომ საქართველოში კლანური, არარეფორმირებული, მახინჯი სამართლებრივი სისტემაა (რაზეც არაერთხელ ყველას გვისაუბრია, მაღალი ტრიბუნიდან თუ ისე) ამიტომ უმორჩილესად გთხოვთ ჩვენო მეგობრებო, რომ არ დაიშუროთ ძალისხმევა, რუსეთის მიერ დევნილი პრეზიდენტის დასახმარებლად, ამას საქართველოს სამომავლო განვითარებისთვის უდიდესი მნიშვნელობა აქვს, მე თავად სააკაშვილის მმართველობის დროს ოპოზიციაში ვიყავი, არ მომწონდა მართლმსაჯულების სისტემა, თორემ სახელმწიფო ინსტიტუციების – დასავლური ღირებულებების კუთხით, ქვეყნის აღმშენებლობის თვალსაზრისით უბადლო ლიდერი – ხელმძღვანელი იყო ის, მან განადგურებული, ჩაბნელებული (პირდაპირი მნიშვნელობით – უშუქობა – უპურობა – შეიარაღებული ბანდიტები ქუჩებში) ქვეყანა ჩაიბარა.
პოსტ საბჭოურ, ნაომარ ქვეყანაში ყველა პრეზიდენტს გაუჭირდა უცბად სამართლებრივი სისტემის რეფორმა და ამით (მიზანმიმართულად) რუსეთის უშიშროების მიერ “სტრუქტურებში ჩატოვებული” აგენტურა ყოველთვის თავის საქმეს “იუველირულად” ასრულებდა ქართული დამოუკიდებელი საქართველოს და მისი პრეზიდენტების წინააღმდეგ, რა თქმა უნდა, განსაკუთრებული ბრძოლა მიხეილ სააკაშვილს გამოუცხადეს და იმასაც კი ბედავდნენ და აბრალებდნენ, რომ ომი სააკაშვილმა დაიწყოო, რაც რა თქმა უნდა, სიცრუე იყო (და ყოველთვის ვამბობდი რომ სიცრუე იყო, მაშინაც 2008 წლიდან ხმამაღლა ვამბობდი ,ყველა გამოსვლაში ტვ ეთერში, რომ ეს სიცრუე გახლდათ) და აი ჭეშმარიტება ბატონებო: სტრასბურგის საბოლოო დასკვნაც დაიდო, რომ “საქართველოს ომი არ დაუწყია”, ამ ომისთვის რუსეთი დიდი ხანია ემზადებოდა. ამის შესახებ თავად რუსეთის პრეზიდენტმა განაცხადა: “2006 წლიდან ვემზადებოდითო”, საერთოდაც მრავალი წელია გვავიწროვებს ეს ჩრ. “მეზობელი”, ხან აფხაზეთში უმოწყალოდ დაგვბომბა (ხალხი გადაჰკიდა ერთმანეთს) და წაგვართვა, ხან შუა რუსთაველზე აგვჩეხა ნიჩბებით 1989 წელს, ხან 2008 წელს სამაჩაბლო დაბომბა- აწამეს ხალხი….. აი აქ არის, როგორც იტყვიან “ძაღლის თავი ჩამარხული”, აი აქ არის სიმართლე….
მომიტევეთ, სიტყვას აღარ გავაგრძელებ, დასასრულს გეტყვით მხოლოდ ერთს: საქართველო ყოველთვის თავისი კულტუროლოგიით, ღირებულებებით ძირძველი ევროპა იყო, ის უთუოდ ბრწყინვალე-ღირსეული პარტნიორი იქნება სამომავლოდ დასავლური ოჯახის, ცოტა “გაგვიჭირდა” ამ დამოუკიდებლობის გზაზე, ამ ლამაზ ქვეყანას დიდი ბრძოლა გამოუცხადა, “დიდმა და ბოროტმა იმპერიამ”, არ მიგვატოვოთ მეგობრებო, კიდევ ერთხელ უმორჩილესად გთხოვთ დახმარებას, საქართველოს გადარჩენა რეფორმირებული, სამართლიანი მართლმსაჯულების სისტემაშია, რომლის გამოყენების საშუალებაც უნდა მიეცეს რუსეთის მიერ დევნილ მესამე პრეზიდენტ სააკაშვილს, რომლის სიცოცხლეც ახლა საფრთხეშია!
პატივისცემით მოგმართავთ თქვენი მეგობარი-დამოუკიდებელი დეპუტატი პარტია “კანონი და სამართლის” თავმჯდომარე, თამარ ჩარკვიანი, თქვენი თანადგომის იმედით”, – წერს ჩარკვიანი.
შეგახსენებთ, რომ საქართველოს მესამე პრეზიდენტი 24-ე დღეა რუსთავის მე-12 პენიტენციურ დაწესებულებაში პატიმრობაში იმყოფება და შიმშილობს.