აჭარიდან უკვე ექსპორტირებულია 7000 ტონა სტანდარტული მანდარინი. დღეს ბათუმის პორტიდან გემი ”კაუნასით” 300 ტონა ციტრუსის გადაზიდვა განხორციელდა. – აღნიშნულ ინფორმაციას აჭარის მთავრობის ადმინისტრაცია ავრცელებს.
მთავრობის ადმინისტრაციის ინფორმაციით, ავტონომიური რესპუბლიკის თავჯდომარე, თორნიკე რიჟვაძე სოფლის მეურნეობის მინისტრთან ერთად, ბათუმის პორტში ექსპორტის მიმდინარეობის პროცესს ადგილზე გაეცნო.
„აჭარაში აქტიურად მიმდინარეობს ნარინჯისფერი რთველი, როგორც ექსპორტი, ასევე რეალიზაცია. დღეს ჩვენ დავათვალიერეთ და ადგილზე გავეცანით მიმდინარე ექსპორტის პროცედურას. ბორანის მეშვეობით, კვირაში 2-ჯერ ექსპორტზე გადის დაახლოებით 300 ტონაზე მეტი ციტრუსი. დღემდე, უკვე ექსპორტირებულია 7 000 ტონაზე მეტი მანდარინი აჭარიდან და დაახლოებით, 40 000 -ზე მეტი ტონა ციტრუსის ექსპორტი იგეგმება წლის განმავლობაში. განსაკუთრებით მნიშვნელოვანია, რომ ყველა ის მიმდინარე დამუშავების ოპერაცია, რომელიც ექსპორტისთვის არის საჭირო, ხორციელდებოდეს უსწრაფესად, არცერთ ექსპორტიორს არ ჰქონდეს მნიშვნელოვანი შეფერხება. ეს მთლიანი ჯაჭვი უნდა იყოს ეფექტური, უნდა იყოს სწრაფი, რომ ყველამ ფერმერმა შეძლოს დაგეგმილი შემოსავლების მიღება. ამისთვის გაკეთდება ყველაფერი “, – აღნიშნა რიჟვაძემ.