“აუცილებელია, საარჩევნო საკითხების მცოდნე მაღალი დონის დელეგაციის ჩასვლა აშშ-ში, რათა პირადად მათგან მიიღონ კონგრესმენებმა ინფორმაცია” – ამის შესახებ, პარლამენტის პირველმა ვიცე-სპიკერმა გია ვოლსკიმ ჟურნალისტებთან განაცხადა.
მისი თქმით, აუცილებელია ჩვენი პარტნიორი ქვეყნის კონგრესთან, რომელიც ესოდენ მძლავრად გვიჭერს მხარს, უფრო ჩაღრმავებული და დეტალური საუბარი შედგეს.
“ხელისუფლებას საკმაოდ სერიოზული არგუმენტები გააჩნია იმასთან დაკავშირებით, თუ რა მოხდა, რატომ შეიცვალა ეს წინადადება და თავისი წინადადების საკმაოდ სერიოზული დასაბუთებაც გააჩნია ხელისუფლებას. წერილის შინაარსი ცნობილია, დასამალი არაა იგივე შინაარსია, რაც პირველ წერილში იყო. ავტორებს თუ დახურულ რეჟიმში აქვთ წერილი მიწერილი რასაკვირველია, შესაძლოა, დახურულ რეჟიმშივე იქნას შენარჩუნებული. თემა ვიცით, საკითხის არსი ვიცით, პოზიცია საკმაოდ მყარია და ის ფორმულა, რასაც სთავაზობს ხელისუფლება ოპონენტებს არის ისეთი, რომელიც პრაქტიკულად არ დაუშვებს კრიზისს, რომელიც სამწუხაროდ რამდენიმე დემოკრატიას დაემუქრა. სასურველია, რომ შევთანხმდეთ და ჩვენი პოლიტიკური ამბიციების გამო, ქვეყნის სტაბილურობა არ დავაყენოთ კითხვის ნიშნის ქვეშ”, – განაცხადა ვოლსკიმ.
ვოლსკი არ გამორიცხავს ოპოზიციასთან თანამშრომლობის შესაძლებლობას, თუმცა ამის მიუხედავად ამ საკითხის მიმართ სკეპტიკურადაა განწყობილი.
“სიტუაციას სიღრმისეულად თუ დავაკვირდებით, პროპორციული არჩევნები საკმაოდ დიდ რესურსს აძლევს ოპონენტებს თავისი შეხედულება გაატარონ და ამასთანავე ისინი დარწმუნებულები არიან იმაშიც, რომ მაჟორიტარულ არჩევნებშიც ექნებათ საკმაოდ სერიოზული წარმატება. ჩვენ სწორედ იმიტომ ვთავაზობთ, რომ 2024 წელშიც მოვრიგდეთ და გადავდოთ პოლიტიკური პარტიის ინტერესი, რადგან თუ ისრაელი გაუძლებს, რაღაც პერიოდი მთავრობის გარეშე ყოფნას, საქართველოსთვის ეს იქნება დამანგრეველი”, – განაცხადა ვოლსკიმ.