პუტინის რეჟიმის მოწინააღმდეგეებს შეკრების საშუალებას მოსკოვის პოლიცია არ აძლევს. სამართალდამცველები ოპოზიციის ლიდერებსა და აქციის მონაწილეებს პირდაპირ ქუჩებში აკავებენ. ოპოზიციის ერთერთი ლიდერი – ლუბოვ სობოლი ძალოვანებმა მისივე შტაბთან დააკავეს და განყოფილებაში გადაიყვანეს. ის ერთ-ერთია ოპოზიციის კანდიდატებიდან, ვინც ცენტრალურმა საარჩევნო კომისიამ მოსკოვის საკრებულოს არჩევნებზე არ დაუშვა.
დღევანდელი აქციის მთავარი ლოზუნგიც სწორედ არჩევნებს უკავშირდება – “დავიბრუნოთ არჩევანების უფლება” – ამ შინაარსის შეძახილებით ხალხი საპროტესტო მსვლელობის გამართვას ცდილობს, თუმცა სამართალდამცველები ამის საშუალებას არ აძლევენ.
უკვე ცნობილია, რომ დაკავებულია 350-მდე ადამიანი, მათ შორის არიან ჟურნალისტებიც, რომლებიც მიმდინარე აქციას და დაკავებებს აშუქებდნენ.