რუსეთ-საქართველოს შორის ერთჯერადი, არარეგულარული ფრენები ისევ ხორციელდება. 25 ივლისს მოსკოვიდან თბილისში კერძო თვითმფრინავი, ფრანგული წარმოების Dassault Falcon 2000 ჩამოფრინდა.
საქართველოს პირველი არხი სამოქალაქო ავიაციის სააგენტოს დაუკავშირდა და შესაბამისი ინფორმაცია გამოითხოვა.
სააგენტოში განმარტეს, რომ ფრენა (ე.წ. business flight) რუსეთის საავიაციო ხელისუფლების ნებართვით შესრულდა. ამასთან, საჰაერო ხომალდის ტექნიკური დოკუმენტაციის შესწავლის შემდეგ, ფრენაზე საქართველოს სამოქალაქო ავიაციის სააგენტოს მხრიდანაც გაიცა ნებართვა.
„თვითმფრინავი რეგისტრირებულია მანის კუნძულებზე (Isle of Man) და არ იმყოფება რუსეთის ფედერაციის სამოქალაქო საჰაერო ხომალდების სახელმწიფო რეესტრში“, – აცხადებენ სამოქალაქო ავიაციის სააგენტოში.
უწყებაში მიუთითებენ, რომ მიმდინარე წლის 8 ივლისიდან, ქართული და რუსული ავიაკომპანიებისთვის საქართველოსა და რუსეთს შორის საჰაერო მიმოსვლის აკრძალვაზე გადაწყვეტილება მიღებულ იქნა ცალმხრივად, რუსეთის ფედერაციის მიერ.
წყარო: პირველი არხი